བརྩེ་དྲན་བསྣོལ་མའི་ཡིད་ཀྱི་དྲ་བ་ན།།
སྐྱོ་གདུང་ཤུགས་ཀྱིས་བསུས་པའི་ཞང་བོ་ལགས།།
ཆུང་ནས་ས་མཐར་ཉུལ་བའི་ཚ་བུ་ངས།།
དྲིན་ལན་རྩྭ་རྩེ་ཙམ་ཡང་འཇལ་མ་ཐུབ།།
ད་དུང་མི་ཚེ་རིང་དུ་མཆིས་ལགས་བསམ།།
ལྷན་གཅིག་མཇལ་བའི་དུས་ཀྱང་ལོས་ཡོང་བསམ།།
ཕུགས་འདུན་སེམས་ལ་ཉར་ཚད་སྟོང་སོང་ཐལ།།
ཡུལ་མཐའི་གྲོང་གསེབ་འདི་ནས་ཁེར་ངུ་བྱེད།།
རྒན་པོའི་དཀའ་ངལ་གཞོན་ནུས་སེལ་ཚུལ་གྱི།།
ཡ་རབས་དམ་བའི་སྲོལ་ནས་ང་མཆིས་སོང༌།།
ཚ་བུ་སྐྱེས་ནས་སྐྱེས་གོ་མ་ཆོད་ཐལ།།
འཁོས་ཆུང་མི་ལུས་བླངས་པ་དོན་མེད་རེད།།
དེ་རིང་སྐྱོ་བས་མིག་ཆུ་གཏོར་རོགས་མེད།།
ཁོག་གི་སྡུག་སེམས་ཁ་ནས་བཤད་ས་མེད།།
སྡུག་དང་མཆི་མ་ལྐོག་ནས་ལྐོག་ཏུ་མུད།།
སྙིང་ཁུང་རུས་པའི་གཏིང་ནས་ཁྱོད་ཉིད་དྲན།།
འཁོར་བའི་སྡུག་བསྔལ་འབར་པའི་མེ་དཔུང་འདི།།
ཞི་བྱེད་ཤཀྱཱ་མུ་ནེའི་ཆོས་ཡིན་རུང༌།།
སྐྱོ་གདུང་ན་ཟུག་སེལ་བའི་བདུད་རྩི་ལ།།
དབུ་ཆང་མངར་མོའི་ཆབ་འདི་ང་ལ་རན།།
༢༠༠༦།༤།༡༥་གཉེན་ཆེན་ཐང་ལྷ་རུ་བཀོད་ཡོད།
No comments:
Post a Comment