དེ་རིང་དབེན་ལྗོངས་རི་བོའི་ཁོར་ཡུག་འདི་མཛེས་ལ།།
སློབ་རིགས་གཞོན་ནུ་རྩེ་བའི་དགའ་སྟོན་འདི་མཚར་ལ།།
ཟས་སྣ་སྡེར་ལ་བཤམས་པའི་རོ་བཅུད་ནི་ཞིམ་ཡང༌།།
ཞེ་འདང་ཕྱི་རུ་འཁྲི་སའི་ལྕུག་མ་འདི་སུ་ཞིག།
རྒྱ་མཚོ་སྔོན་མོའི་རླབས་ཀྱི་ཕྲེང་ཚོགས་འདི་མཛེས་ལ།།
གློག་གྲུ་མྱུར་མོ་བསྐྱོད་པའི་རྩེ་གར་འདི་མཚར་ལ།།
ཡངས་པའི་མཚོ་མོའི་ངོགས་ཀྱི་སྤྲོ་འཆམ་འདི་སྐྱིད་ཀྱང༌།།
བརྩེ་འདང་ཤུལ་ན་ལྷག་པའི་ཁོར་ཡུག་འདི་ཅི་ཞིག།
སྣ་ཚོགས་མེ་ཏོག་བསྐྲུན་པའི་སྐྱེད་ཚལ་འདི་མཛེས་ལ།།
འདབ་ཆགས་སྣ་ཚོགས་གསོས་པའི་སྐད་གསུང་འདི་སྙན་པ།།
མཛེས་སྡུག་ཕྱོགས་སུ་བཞེངས་པའི་དགའ་ཚལ་འདི་སྐྱིད་ཀྱང༌།།
མིག་གི་དགའ་སྟོན་འཕྲོག་པའི་ཞལ་རས་འདི་ཅི་ཞིག།
སྤྲིན་དཀར་འདབ་མའི་ཐོག་གི་བཞུད་ལམ་ནི་བདེ་ཀི།
མཁའ་གྲུ་དུང་གི་སྲས་མོའི་འཕུར་ཤུགས་འདི་མཚར་ལ།།
ས་གཞིའི་ཕུན་ཚོགས་མཐོང་བའི་ངོ་མཚར་ནི་ཆེ་རུང༌།།
གནམ་སའི་བར་ནས་ཤོར་བའི་སེམས་པ་འདི་ཅི་ཞིག།
རྡོ་ཤེལ་བརྩིག་པ་མཐོ་བའི་མཁར་རྫོང་ནི་བརྗིད་ལ།།
གློག་བཞུ་སྣ་ཚོགས་འཚེར་བའི་ལྡིང་ཁང་ནི་ལེགས་པ།།
སྤྲོ་སེམས་མདུན་ན་སྒྱུར་བའི་གོམ་སྟབས་རེ་སྤོས་ཀྱང༌།།
བརྩེ་བས་རྒྱབ་ནས་འཆིང་བའི་ཞགས་ཐག་འདི་ཅི་ཞིག།
༢༠༠༦ལོའི་དབྱར་ཁ་ཞིག་ལ།l
No comments:
Post a Comment