སོ་སྐྱེས་སྙན་ངག

གཡུ་ཡི་ལང་ཚོའི་མཛེས་པ་ཀུན་འཕྲོག་གི་ལྷ་མོ།།

ཟག་མེད་བདེ་བའི་དཔལ་སྟེར་རྗེ་བཙུན་གྱི་སྒྲོལ་མ།།

འཇིགས་པ་བརྒྱད་ལས་སྐྱོབ་པའི་བརྩེ་ཆེན་གྱི་ཨ་མ།།

གསོན་སྙིང་མེ་ལ་བསྲེག་པའི་བུ་ང་ལ་གཟིགས་དང༌།།

སྙིང་རླུང་ཁོང་ནས་འཁྲུགས་པའི་རྒྱ་སྟག་གི་ང་རོ།།

ཤུགས་ཆེན་མགྲིན་ནས་བསྐྱེད་པས་ཁ་ཤ་རང་འདར་གྱིན།།

སེམས་ཀྱི་ཚང་ལ་གནས་པའི་རབ་དཀར་གྱི་ཕུག་རོན།།

དམར་པོ་ཁྲག་གིས་སྦགས་པའི་སྣང་བ་འདི་མི་སྐྱིད།།

འདོད་སྲེད་རླབས་ཀྱིས་ཕྱུག་པའི་རྦབ་ཆུ་ཡི་འགྲོས་གར།།

གྱེན་དུ་བཟློག་པ་མེད་ལ་ཞེན་ཡུལ་གྱི་ལང་ཚོ།།

ཧུབ་ཀྱིས་འཐུང་བར་རྒྱུགས་པའི་དྲན་ཤེས་ཀྱི་བུ་ཆུང༌།།

གཟར་བོའི་གཡེང་ལ་ཁུར་བའི་འཚོ་བ་འདི་མི་སྐྱིད།།

སྡང་བའི་གློག་ཞགས་མཆེད་པའི་སྤྲིན་ཕུང་གི་གསེབ་ལས།།

ཕྲག་དོག་དུག་གིས་གཟིར་བའི་གཡུ་འབྲུག་གི་ཁ་ནས།།

ངོ་མཚར་ཡུལ་ལས་འགོངས་པའི་མཛེས་སྡུག་གི་སྐྱེད་ཚལ།།

གནམ་ལྕགས་ཐོག་གིས་གཞོམ་པའི་ཁོར་ཡུག་འདི་མི་སྐྱིད།།

མུན་པའི་ཁ་དོག་བརྩེགས་པའི་སྨག་རིམ་གྱི་ཀློང་ནས།།

སྣང་བའི་མེ་ལྕེ་གསོད་པའི་གཟུགས་མེད་ཀྱི་འབྱུང་པོས།།

རྨོངས་པའི་ཞགས་རིང་བཏབ་པས་སེམས་ཉིད་ཀྱི་ལྷ་མོ།།

འགུལ་མེད་དམ་དུ་བཅིངས་པའི་བཙོན་ཁང་འདི་མི་སྐྱིད།།

སེམས་པ་གཟེངས་ཀྱི་གཡུ་རལ་ཨ་སྔོན་དུ་གསིག་པའི།།

ཕྱོགས་ཀྱི་མགོན་ལ་སྙེམས་པའི་ང་རྒྱལ་གྱི་སེང་གེས།།

ཞི་དུལ་སྙིང་གི་དྭངས་མ་སྐྱེས་མཆོག་གི་གཞོན་ནུ།།

དྲེགས་པའི་སྡེར་ལ་ཚུད་པའི་གོམས་གཤིས་འདི་མི་སྐྱིད།།

ཡོད་ཡོད་མཛེས་པར་བསྒྱུར་པའི་རྣམ་གཡེང་གི་སྲིན་མོ།།

མཐོང་ལམ་འགོག་པ་མེད་པར་ངོ་མཚར་གྱི་སྒྱུ་མས།།

ཡིད་ཀྱི་བརྟན་པར་གནས་པའི་རྣམ་དཔྱོད་ཀྱི་བུ་ལ།།

བླ་སྲོག་སྙིང་ནས་འཁྱེར་བའི་སྤྲང་འཁྱམས་འདི་མི་སྐྱིད།།

སྙོམས་ལས་གཉིད་ཀྱི་བདེ་བ་ཨ་འཇམ་གྱི་ཚ་རུ།།

རྒྱུན་དུ་གོས་སུ་གྱོན་པའི་ལེ་ལོ་ཡི་བདག་པོས།།

ཤེས་བྱའི་ལོངས་སྤྱོད་འཐུང་བའི་རྣམ་རིག་གི་བུ་ལ།།

བརྩོན་པའི་སྤོབས་པ་འཕྲོག་པའི་སེམས་པ་འདི་མི་སྐྱིད།།

དགེ་བའི་རོ་བཅུད་སྣུམ་པོའི་འཚོ་བ་དེ་བསམ་ནས།།

ཞི་བྲལ་ཉོན་མོངས་མཐུག་པའི་སྒོ་གླེགས་ཀྱི་དངོས་སུ།།

དཀའ་དང་གདུང་བ་དྲག་པོས་ཡང་ཡང་དུ་འཐབ་ན།།

སེམས་ཀྱི་ཤེལ་གོང་ཆག་པའི་ཟུག་རྔུ་འདི་མི་སྐྱིད།།

འབྱུང་བཞིའི་ཁམས་སུ་འདྲེས་པའི་ལུས་ཕུང་གི་འདུ་བ།།

མི་སྙོམས་ཀུན་ནས་དཀྲུག་པའི་ན་ཡིག་གི་འོག་ཏུ།།

རྣག་དང་ཁྲག་གི་འཚོ་བའི་གདུང་བ་རང་སྤྱོད་པས།།

རྩེ་དགོད་སྣང་བ་མེད་པའི་མི་ཚེ་འདི་མི་སྐྱིད།།

ལུས་ཀྱི་ལང་ཚོ་མུན་པའི་ཁུང་གསེང་དུ་ཡིབ་དུས།།

ཚེས་ཆེན་འཛུམ་པའི་བཅུད་ཀྱི་སྐྲ་ལོ་རུ་བཞད་དེ།།

དབང་ལྔའི་ཕུན་ཚོགས་བཅོམ་པའི་དགྲ་བོ་ཡི་སྔོན་དུ།།

ཤ་རུས་འཁྲི་ཤིང་རྒས་པའི་ལུས་རྟེན་འདི་མི་སྐྱིད།།

འཆི་བདག་ཆུ་སྲིན་ཁྲོས་པའི་འཇིགས་རུང་གི་ཁ་ནས།།

ཨུ་ཧུའི་མགྲིན་མཚོ་འཕྱུར་བའི་ཉམ་ཐག་གི་བུ་ལ།།

ཡིད་འཕྲོག་འཕགས་མའི་ཐུགས་ཀྱི་རྩེ་དགའ་རང་བརྐྱང་སྟེ།།

ཤར་ཕྱོགས་གཡུ་ལོ་བཀོད་པའི་ཞིང་ཁམས་སུ་དྲོངས་ཤིག །

་་་་་་་་་་་་་་་་་་་་་་་་་་་་་་་་ཤཱཀྱའི་འོད་སྣང་དུས་དེབ་ཏུ་བཀོད་ཡོད།