དགེ་འདུན་ཆོས་འཕེལ།
རྡོག་སྒྲ་མེད་པའི་གོམ་ཁ་ཡང་མོས་སྐུ་དཔོན་ཚོའི་སྒོ་ཁྱིམ་ཡང་ཡང་བརྡུངས་ཀྱང༌། སུ་ལ་གོ་ཐོས་མེད་པ་ནི་ཁྱོད་ཀྱི་འཇིག་རྟེན་གསར་བ་ཞིག་རེད། ཧོབ་ཆས་ཁེངས་པའི་ཐོག་ཁང་གི་གསང་བ་དེ་ནས།ཁྱེད་ཀྱི་བརྩམས་ཆོས་ཀྱི་གྲངས་ཀ་ལ་སྐུ་དཔོན་ཚོས་ཐོབ་རྩོད་བྱེད་དུས་ཁྱོད་ཀྱིས་ངུ་འབོད་དང༌། ལག་འཛིང་ཇི་ལྟར་བྱས་ཀྱང་ཁྱེད་ནི་ཐོགས་རེག་བྲལ་བའི་རྣམ་ཤེས་འཁྱམས་པོ་ཞིག་རེད། སྐུ་དཔོན་ཚོའི་བར་ན་འཐབ་རྩོད་ཀྱི་འཁོན་ཞེན་ཆེ་ཡང༌། ཡིད་དུ་འོང་བའི་རྩོམ་བྱང་གི་གྲངས་ཀ་རེ་རེས། གསེར་ཞལ་ལ་འཛུམ་མདངས་ཤིག་ཤིག སྤྲོ་སེམས་ཀྱི་སྣང་བ་ཨ་རག་གི་བཟི་ཁས་བཏེགས། འདྲེན་བྱེད་ཀྱི་དབང་པོ་ཤོ་རྩེ་ཡིས་བསླུ་བྲིད་ལ་འཁོར་དྲགས་པས། ཁོང་ཚོས་གློ་བུར་དུ་མཐོང་བ་ནི་ཁྲག་དར་ཡིན་ལ། ཁོང་ཚོ་གློ་བུར་དུ་སྔངས་དགོས་པ་ནི་འཕྲུལ་མཚོན་ཡིན། སྐུ་དཔོན་ཚོའི་མཐེ་བོང་དགྲ་དམག་གི་སྔོན་ནས་སྒྲེང་དུས། ཁྱོད་ཀྱིས་ཁོང་དགོད་ཅིག་བྱས་ཡོད་དམ། ཡང་མི་ཁྲག་གི་མཚོ་མོ་ནོར་གླིང་གི་སྒོ་ནས་སྐྱོམ་དུས། ཁྱོད་ཀྱིས་ངུ་ཤུམ་རྒྱག་བཞིན། ངུ་མ་དགོད་ཀྱིས་མི་རིགས་དིའི་ཆེད་དུ་ལོ་རྒྱུས་སུ་གཏན་ཚིགས་དྲངས་ནས་འཇིག་རྟེན་གྱི་ཁྱོན་ལ་རྩོད་གླེང་ཇི་ལྟར་བྱས་ཀྱང༌། ཁྱེད་ནི་བར་དོའི་ཁམས་ཀྱི་ཁྲིམས་རྩོད་པ་ཞིག་ལས།
དོན་གྲུབ་རྒྱལ།
ཤོར་ཟིན་པའི་མི་རིགས་ཀྱི་ངོ་བོ་དེ། ཁྱོད་ཀྱི་སྙན་ངག་གསར་བའི་བླ་སྲོག་ཏུ་བཀུག་སྟེ་དར་གཞོན་བོད་མིའི་སེམས་ཁམས་སུ་བཏབ། སླར་ཡང་མི་འཆོར་བའི་ཕྱིར་དུ་དྲོད་རླབས་འཕྱུར་བའི་ཚེ་སྲོག་དཔང་པོར་ཕུལ་ནས། ཁྱོད་ཉིད་མི་ཡུལ་ནས་ཆས་ཤིང་མི་ཡུལ་ལ་འཁོར། དམའ་འབྲིང་མཐོ་གསུམ་གྱི་སློབ་ཁང་ན་ཁྱོད་ཉིད་འཁོར། རྩོད་གླེང་འཕྱོ་བའི་རྩྭ་ཐང་གི་གྲུ་ཁ་ན་ཁྱོད་ཉིད་འཁོར། ནོར་ལུག་གི་འབའ་སྒྲས་ཁེངས་པའི་ལྷས་བར་ན་ཁྱོད་ཉིད་འཁོར། འཁོར་ཞིང་འཁོར་བཞིན་ཁྱོད་ཀྱིས་སློབ་ཕྲུག་ཚོའི་རྣ་ལྟག་ནས་ཤེས་རིག་གསུང་གླེང་ཇི་ལྟར་མཐོ་ཡང༌། ཕུ་ནུ་དམེ་ཁྲག་གི་བར་ནས་སྨྲེང་གླུ་ཇི་ལྟར་གྱེར་ཀྱང༌། རྫི་གཞོན་ཕོ་མོ་ཚོའི་རྣ་ཀོང་ན་མི་རིགས་ཀྱི་སྙིང་ནད་ཇི་ལྟར་བསྐུལ་ཀྱང༌། ཁྱོད་ཀྱིས་ཤི་གསོན་མ་ངེས་པའི་མི་རིགས་ཀྱི་སྡུག་བསྔལ་དེ། ཕོ་བྲང་པོ་ཏཱ་ལའི་རྩིག་ངོས་སུ་བྲིས། བྲིས་པའི་སྙན་ངག་ཡུམ་བུ་བླ་མཁར་གྱི་རྩེ་ནས་གྱེར་ཀྱང༌། ཁྱེད་ནི་མི་ཡུལ་ནས་འདས་པའི་མི་བོ་ཞིག་སྟེ། བར་དོའི་ཁམས་ཀྱི་སྙན་ངག་པ་ཞིག་ལས།
ཐུབ་བསྟན་དངོས་གྲུབ།
ཤར་ནུབ་མི་རིགས་ཀུན་གྱི་རྡོག་བར་ཟགས་པའི་ང་ཚོའི་བདེན་བ་དེ།ཁྱེད་ཀྱིས་ཤ་ཚུགས་ཀྱི་སྒྲོན་མེ་སྤར་ནས་འཇིག་རྟེན་ལ་ར་སྤྲོད་བྱས་ཀྱང༌། མཐོང་ཐོས་དང་གདེང་འཇོག་མི་བྱེད་པའི་མི་ཚོགས་ཀྱི་་་་་་སེམས་ཁམས་ནི་ཇི་འདྲའི་སྲ་ལ། ཇི་འདྲའི་མཁྲེགས། ད་དུང་མི་ངོམ་པའི་ཞིང་ཁམས་དེ་ནས་བྱེས་བོད་ཀྱི་ནད་ཡམས་ལ་རྒོལ་ཕྱིར་རང་ལུས་མེ་རུ་སྒྲོན། ཁྱོད་ཀྱིས་སྒྲོན་ལ་ཆོལ་གསུམ་གྱི་རྙོག་འཛིང་བར་ན་ཁྱོད་ཀྱིས་སྒྲོན། ལྷ་འདྲེ་སྲུང་རྩོད་ཀྱི་བར་ན་ཁྱོད་ཀྱིས་སྒྲོན། གཞོན་སྐྱེས་དང་ཨ་སྒོར་བར་ན་ཁྱོད་ཀྱིས་སྒྲོན། ཁྱོད་ཀྱིས་སྒྲོན་མེ་ཀློང་དུ་འདྲེས་པའི་ཚེ་སྲོག་གིས་བྱེས་བོད་ཀྱི་འགལ་ཟླ་ལ་ངོ་རྒོལ་ཇི་ལྟར་བྱས་ཀྱང༌། ད་ལྟ་ཁྱེད་ཉིད་མཐོང་སྐབས་མེད་ལ། འཛིན་རེག་ཀྱང་མེད། གལ་སྲིད་མཐོང་ན་ཁྱེད་ལ་་་་་སྡུག་གྱོང་་་་་ཞེས་པའི་དམོད་ཚིག་འབྱུང་སྲིད། ངེས་པར་འབྱུང་སྲིད། དཔའ་པོ་ལགས་་་་་་ངས་སྐད་ཆ་གཞན་དུ་བསྒྱུར་ནས་བཤད་ན། མི་ཡུལ་གྱི་གངས་རི་འཁྱགས་པོ་དེ་མེ་ཀློང་དཀྱིལ་གྱི་ཚེ་སྲོག་གིས་ཇི་ལྟར་བསྲོས་ཀྱང༌། ཁྱེད་ནི་བར་དོའི་ཁམས་ཀྱི་མེ་ལྕེ་ཞིག་ལས།
མཐའ་བསྡོམས།
རི་ལུང་ཐམས་ཅད་དར་ལྕོག་གིས་བཀང༌། ཡིག་དྲུག་གི་དབྱངས་རྟས་བར་སྣང་གི་དཀྱིལ་འཁོར་བཟུངས་ཀྱང༌། ད་དུང་ཁྱེད་ཅག་བར་དོ་ནས་སྒུག་དགོས་པ་དེ། མེས་པོ་ཁྲོས་པའི་བཀའ་ཆད་ཡིན་ནམ། ཡང་ན། སེང་དར་ལ་ཆགས་པའི་བརྩེ་ཞེན་ཡིན། རེད་་་་་ཉི་མའི་འོད་སྟོང་ཕོ་བྲང་པོ་ཏཱ་ལའི་མདུན་ཐང་དུ་འཕྲོ་དུས། འཛུམ་མདངས་རྒྱས་པའི་མི་ཚོགས་ཀྱི་འཚངས་ཀ་ཤིག་ཤིག གྲལ་བསྒྲགས་པའི་རུ་དཔུང་དག་གི་གོམ་པའི་འདེགས་འཇོག་མཉམ་ཞིང་མཛེས་ལ། སྙན་ཞིང་འཇེབས་པའི་གླུ་དང་རོལ་མོའི་འགྱུར་ཁུག་རེ་རེས། སེང་དར་གྲུ་བཞི་མ་ནམ་མཁའ་ལ་སྒྲེང་བའི་འཐེན་བསྐྱོད་རེ་རེ་བཞིན། ང་ཚོའི་རྒྱལ་ཁ་སྤྲིན་དཀར་དང་ནམ་མཁའི་ཁོང་གསེང་ནས་འཛུམ་དུས། ཁྱེད་ཅག་གིས་བར་དོའི་ཁམས་ནས་སླར་ཡང་ལམ་ཁ་གསར་བ་ཞིག་འཚོ་དགོས་པའི་ཅོང་བརྡ་ཁྲོལ་ངེས་་་་་་
No comments:
Post a Comment