འགྱོད་གདུང་གི་མིག་ཆུ།

བརྩེ་དྲན་བསྣོལ་མའི་ཡིད་ཀྱི་དྲ་བ་ན།།

སྐྱོ་གདུང་ཤུགས་ཀྱིས་བསུས་པའི་ཞང་བོ་ལགས།།

ཆུང་ནས་ས་མཐར་ཉུལ་བའི་ཚ་བུ་ངས།།

དྲིན་ལན་རྩྭ་རྩེ་ཙམ་ཡང་འཇལ་མ་ཐུབ།།

ད་དུང་མི་ཚེ་རིང་དུ་མཆིས་ལགས་བསམ།།

ལྷན་གཅིག་མཇལ་བའི་དུས་ཀྱང་ལོས་ཡོང་བསམ།།

ཕུགས་འདུན་སེམས་ལ་ཉར་ཚད་སྟོང་སོང་ཐལ།།

ཡུལ་མཐའི་གྲོང་གསེབ་འདི་ནས་ཁེར་ངུ་བྱེད།།

རྒན་པོའི་དཀའ་ངལ་གཞོན་ནུས་སེལ་ཚུལ་གྱི།།

ཡ་རབས་དམ་བའི་སྲོལ་ནས་ང་མཆིས་སོང༌།།

ཚ་བུ་སྐྱེས་ནས་སྐྱེས་གོ་མ་ཆོད་ཐལ།།

འཁོས་ཆུང་མི་ལུས་བླངས་པ་དོན་མེད་རེད།།

དེ་རིང་སྐྱོ་བས་མིག་ཆུ་གཏོར་རོགས་མེད།།

ཁོག་གི་སྡུག་སེམས་ཁ་ནས་བཤད་ས་མེད།།

སྡུག་དང་མཆི་མ་ལྐོག་ནས་ལྐོག་ཏུ་མུད།།

སྙིང་ཁུང་རུས་པའི་གཏིང་ནས་ཁྱོད་ཉིད་དྲན།།

འཁོར་བའི་སྡུག་བསྔལ་འབར་པའི་མེ་དཔུང་འདི།།

ཞི་བྱེད་ཤཀྱཱ་མུ་ནེའི་ཆོས་ཡིན་རུང༌།།

སྐྱོ་གདུང་ན་ཟུག་སེལ་བའི་བདུད་རྩི་ལ།།

དབུ་ཆང་མངར་མོའི་ཆབ་འདི་ང་ལ་རན།།

༢༠༠༦།༤།༡༥་གཉེན་ཆེན་ཐང་ལྷ་རུ་བཀོད་ཡོད།

གར་མའི་སྒེག་ཉམས་སུ་འཁྲིས་པའི་སེམས་པ།

་་་་་་་་་་་་་་་་་་་་་་་་རྒྱ་གར་གྱི་གློག་བརྙན་འཁྲབ་སྟོན་མཁན་༼པེས་ཏེ་ཟུན་ངྷ༽་ལ་ཕུལ།

སྒེག་ལྡན་མ་་་་

འཛུམ་མདངས་ལས་ཤར་བའི་ཁྱོད་ཀྱི་ཉི་གཞོན། ཅི་འདྲའི་གཟི་མདངས་དང༌། ཅི་འདྲའི་དྲོད་རླབས་ཆེ། ཆབ་རོམ་གྱི་ངའང་སྐད་ཅིག་ཏུ། དྲངས་བསིལ་གྱི་ཆུ་མིག་ཏེ། དབྱར་གཞུང་གི་གཙང་བོརགྱུར།

སྒེག་ལྡན་མ་་་་་

ང་ཡང་ལྷག་རླུང་དང་འགྲོགས་ཏེ། ཁྱེད་ཀྱི་ལྕང་ལོའི་ཁམས་སུ་བབས། འཇམ་མཉེན་གྱི་རེགས་བྱས་གྲུབ་པའི་སྐྲ་ལོའི་ཉག་མ་རེ་ལ། དྲི་བསུང་གི་རྣམ་བ་རེ་རེ་འཐུལ་བས། བདེ་སྣང་གི་ལྕང་ལོའི་ཕ་མཐར་བརྒལ་བ་ནི་ཤིན་ཏུ་དཀའ།

སྒེག་ལྡན་མ་་་་་་་་་

ལྷིང་འཇགས་ཀྱི་སྤྲོ་སྣང་དབུས་སུ་ཁྱོད་ཉིད་བདེ་ཕྱིར། བདག་ཀྱང་ཆུ་ཐིགས་དང་ཟེགས་མའི་ངང༌། ཁྱེད་ཀྱི་དཔྲལ་བར་ནས་དལ་བུར་འབབ། ལང་ཚོ་ལས་འབུས་པའི་ཁྱོད་ཀྱི་ཞལ་རས་བདག་གིས་མཐོང༌། མཛེས་སྡུག་གི་གཡོ་རླབས་འགྲིམ་གྱིན། བདག་གིས་འཚོལ་བཞིན་པ་ནི་ཁྱེད་ཀྱི་མཆི་སྒྲོས་ལགས། འོ་ཞིག་གནོངས་དང༌། 

སྒེག་ལྡན་མ་་་་་་་་

བདག་ཁྱེད་ཀྱི་མགྲིན་པའི་ངོས་ནས་འགྲེད་ཀྱང་ཟེགས་པའི་ངང༌། མིག་ལམ་ལ་ཤིན་ཏུ་མཛེས་པ་དེ་ནི་བྲང་ངོས་ཀྱི་གངས་རི་ལགས། ཕྱེད་ཆ་མཐོང་བའི་ལང་ཚོའི་ལྷུན་བོའི་བར། བདག་ཅིས་ཀྱང་བཞུར་ན་འདོད། ཁྱོད་ཀྱིས་ནུ་ཤུབ་དམར་བོའི་འཆིང་ཐག་ཅུང་ཟད་ཀློད་རོགས་ཀྱིས།

ཟིན་ཚོར༢༠༠༦། ༣བལ་ཡུལ་གྱི་རྫོགས་ལྡན་ཇ་ཁང་ནས་བྲིས། འོད་སྤྱི་ཚོགས་དུས་དེབ་ཏུ་བཀོད།

རྗེ་བཙུན་སྒྲོལ་མ།

རྗེ་བཙུན་སྒྲོལ་མ་་་་་་་་་

བདག་ཤ་རུས་ཀྱི་ཁོངས་གསེང་ནས་ཕྱི་རུ་ཐོན་དུས། དྭངས་གསལ་གྱི་བར་སྣང་འདི་ན། དག་གཙང་ཡང་གཙང་གི་ཤེལ་སྡེར་རེ་རེའི་ནང་དུ་བསིཁྱེད་ཀྱི་མཚན་སྔགས་ཀྱི་ཏཱམ་ཡིག་ལ་འཇུས་ཏེ།ལ་ཆུས་མེར་ཏེ། མེ་ཏོག་པདྨ་དང་གུར་གུམ། ཙཱམ་པ་ཀས་མཛེས་པར་བརྒྱན། སྒྲོན་མའི་འོད་སྣང་གིས་བཀབས་པའི་ངས་ཁྱེད་ལ་མཆོད་བཤམས་དང༌། གུས་ཕྱག་གི་ནང་དུ་བདེན་བའི་ཚེ་སྲོག་འདུས་ཡོད།

རྗེ་བཙུན་སྒྲོལ་མ་་་་་་་་་་་

ཁྱེད་ཀྱི་མཚན་སྔགས་ཀྱི་ཏཱམ་ཡིག་ལ་འཇུས་ཏེ། མུན་བ་བབས་པའི་རབ་རིབ་ཀྱི་ནག་ལྗོངས་སུ།  ངས་ཐེ་ཚོམ་གྱིས་སྤོ་པའི་གོམ་ཁ་རེ་རེ། ཁ་བ་ལྟར་མཛེས་པའི་ལམ་བུ་ཞིག་གི་ཆེད་དུ་བཞགས་ཡོད་ཀྱང༌། སུས་ཀྱང་བརྗོད་མི་ཤེས་པའི་ཚོར་འདུ་ཟབ་མོ་དེས་བདག་གི་མདུན་ཕྱོགས་ཀྱི་ལམ་བུ་བཅད་གཏུབ་བྱས།

རྗེ་བཙུན་སྒྲོལ་མ་་་་་་་་་་་་་་

དུང་ཚོར་གྱིས་མེར་བའི་སེམས་ཀོང་ཆུང་ཆུང་དེའི་ཁ་ན།  བརྩེ་འདང་གིས་བསྐྲུན་པའི་ཁྱེད་ཀྱི་འཛུམ་ཞལ་བབས་བྱུང༌།  ངའི་ཁྲག་རྩ་ཐམས་ཅད་འདུས་པའི་དཀྱིལ་འཁོར་དུ།  ཚེ་སྲོག་ལས་སྐྱེས་པའི་ལང་ཚོ་ཁྱད་འཕགས།  ཁྱེད་ཁོ་ནས་བསྩལ་བྱུང༌།

རྗེ་བཙུན་སྒྲོལ་མ་་་་་་་་་་་་་་་

ཕྱི་ནང་གསལ་བའི་ཤེལ་གྱི་ཁང་བཟང་ན།  གསེར་ནག་གིས་བཟོས་པའི་མཛུབ་དཀྲིས་ཟླུམ་པོ། པད་འདབ་བརློན་པས་བསྐྱོར་ཏེ། སེམས་གཞས་འཐེན་པའི་ཁུག་སྣེ་རེ་རེས།  ཁྱེད་ཁོ་ན་དགྱེས་པའི་མཆོད་པ་བཤམ་དུས། རྡུལ་རླངས་འཚུབ་པའི་སེམས་ཁུང་ན་ཞི་ཞིང་དྭངས་པའི་ནམ་མཁའ་རུ་གྱུར། གསེར་ནག་གི་འཛུབ་དཀྲུས་འདི་བདག་གི་ཚེ་སྲོག་ཡིན་ནམ།

རྗེ་བཙུན་སྒྲོལ་་་་་་་་་་་་་་

བླ་སྲོག་གི་རླབས་རིས་འཁྱིལ་ས་རུ། རྣམ་ཤེས་ཀྱི་སྐྱེ་བ་འཕོས་ཏེ། གསེར་སྨྱུག་གི་ཁོག་ཡངས་ན་ཚེ་སྲོག་ཆགས་པའི་གཏམ་རྒྱུད་བྱུང༌།  རྒྱུན་མི་ཆད་པའི་ཟུངས་ཁྲག་དམར་པོ། ངའི་སྐྱེ་བ་ནས་སྐྱེས་པའི་བར་དུ་འཇིགས་སྐྲག་མེད་པར་བཞུར་དགོས།

རྗེ་བཙུན་སྒྲོལ་མ་་་་་་་་་་

ཁ་སང་ངའི་སྙིང་ཁ་གྲི་ཡིས་གཤགས་ཉིན་མོ། ཁ་སང་ངའི་ལས་དབང་རླུང་གིས་ཁུར་ཉིན་མོ། དགྲ་གྲོགས་ཀྱི་དབྱེ་བ་ཤེས་པའི་ཚེ་སྲོག་དེ་ཉིད། ངའི་སྙིང་ཁུང་ན་ཁྱེད་ཁོ་ནས་བསྩལ་བྱུང་བས། སང་ཉིན་གྱི་མུན་པའང་ཁྱེད་ཀྱིས་འཛུམ་མདངས་ཀྱིས་གསལ་བར་ཤོག

  ༢༠༠༦། ༤། ༡༨།ཉིན་བལ་ཡུལ་ནས།

པོ་ཏཱ་ལ།

པོ་ཏཱ་ལ། ཁྱོད་ནི་་་་་ཞིང་ཁམས་ཤིག་གི་མིང་བྱང་ཁུར་ནས་མིག་འཁྲུལ་གྱི་རི་བོ་ཆུང་ཆུང་ཞིག་མ་ཡིན་ཏེ། བཙན་པོ་ཞིག་གིས་མངའ་ཐང་བསྐྱེད་པའི་རྟ་དམག་ཁྲི་སྐོར་གྱི་དཔའ་སྙིང་ལྷུན་ཆགས་ཡིན།

པོ་ཏཱ་ལ། ཁྱོད་ནི་་་་་་་་་གངས་སེང་དཀར་མོས་གཡུ་རལ་བསིགས་སའི་ཁ་བའི་གདན་ཁྲི་ཁོ་ན་མ་ཡིན་ཏེ།  ཕྱོགས་བཞིར་རིན་ཆེན་བརྩིགས་པའི་སྤྲེའུ་རྒོད་ཚང་གི་གན་མཛོད་འཛད་མེད་ཡིན།

པོ་ཏཱ་ལ། ཁྱོད་ནི་་་་་་་གསེར་འབྲུག་སེར་པོའི་སྙིང་ནོར་འཕྲོག་ནས་ཕྱོགས་ཀྱི་བུ་མོའི་བཙོན་ཁང་གཅིག་བུ་ཞིག་མ་ཡིན་ཏེ། རྒྱལ་ཕྲན་དུ་མའི་སྲས་མོ་རྩེ་སའི་ཤར་གླིང་བཙན་པོའི་ཕོ་བྲང་དམར་པོ་ཡིན།

པོ་ཏཱ་ལ། ཁྱོད་ནི་་་་་གཡུལ་འགྱེད་དམག་གིས་མཚོན་ཆ་བརྡར་སའི་འཕྲུལ་རྫོངས་ནག་པོའི་ལྟེ་བ་ཞིག་མ་ཡིན་ཏེ། ལྷོ་གླིང་མཚོ་མོའི་སེམས་འོད་འཁྱིལ་སའི་ཁ་བའི་ལྗོངས་ཀྱི་ཞིང་ས་དཀར་པོ་ཡིན།

                 

ཨེ་མ་་་་་་་་་་་་་་ཡུམ་བུ་བླ་མཁར།

ཁྱེད་ནི་་་་་་གདོད་མའི་ཁོར་ཡུག་གི་བསོད་ནམས་བཞུད་པའི་བོད་ཡུལ་གྱི་མི་རྒན་ཟུངས་ཟད་ཅིག་མ་ཡིན་ཏེ། གནའ་བོའི་སྤྱི་ཚོགས་སུ་འགྲེལ་བརྗོད་ཐུབ་པའི་དེང་གཞོན་གྱི་གསར་འགོད་པ་མཁས་ཆེན་ཞིག་ཡིན།  

    

ཁྱེད་ནི་་་་་་བསང་དུད་ཀྱི་རླངས་ཟས་ཟ་བའི་གཟུགས་མེད་འབྱུང་བོའི་ཕོ་བྲང་ཞིག་མ་ཡིན་ཏེ། ནོར་ལྷས་ཀྱི་ཧྲག་བར་ན་རྩེན་པའི་ལོ་རབས་བུ་མོ་སྙིང་ཐུབ་དགའ་ལོ་ཞིག་ཡིན།

ཁྱེད་ནི་་་་་་ཕག་རྒོད་སྟོང་གི་གཡུལ་ཁ་ཟློག་ཕྱིར་ཞིང་བར་གྱི་རྩྭ་གཟུགས་སྐྱ་བོ་ཞིག་མ་ཡིན་ཏེ།

ཡན་ལག་བཞི་ལྡན་གྱི་གཡུལ་ངོ་ཟློག་པའི་མི་ཡུལ་གྱི་རྗེ་བོ་གཟི་ལྡན་ཞིག་ཡིན།

ཁྱེད་ནི་་་་་་་མྱ་ངམ་ཐང་ན་འགྱིང་བའི་དབུལ་བོ་སྟོང་གི་མཆོད་མེ་ཁོ་ན་མ་ཡིན་ཏེ། ཤེས་རིག་གི་མེ་ཏོག་གསོ་བའི་སྤྲིན་སྟེང་གི་ལྷ་མོའི་འཛུམ་ཟེར་ཞིག་ཡིན།

ཁྱེད་ནི་་་་་་ཆེས་ཐོག་མའི་སྐྱེ་རྒྱུད་ཅིག་གི་ཨ་ཕྱི་རྒན་མོ་ཞིག་མ་ཡིན་ཏེ། ལོ་རྒྱུས་ཀྱི་དཀྱོགས་མཚམས་ནས་འཁྲུངས་པའི་རྩལ་དགུ་ཤེད་དུ་རྒྱས་པའི་ཕོ་གཞོན་རྒོད་པོ་ཞིག་ཡིན།

ཁྱེད་ནི་་་་་་་་ནས་མྱུག་གི་གཡེར་ལས་བགྱི་བའི་སོ་ནམ་བུ་མོའི་ཁྱོ་བོ་ཁོ་ན་མ་ཡིན་ཏེ། གཡང་དཀར་ལུག་གིས་འབའ་སྒྲས་བཏུམ་པའི་མ་ཁྱིམ་བུ་མོའི་དགའ་རོགས་ཤིག་ཀྱང་ཡིན།

ཁྱེད་ནི་་་་་་་ཕྱོགས་མེད་ཀྱི་རེ་བ་ཁུར་བའི་འཇིག་རྟེན་གྱི་མགོན་པོ་ཞིག་མ་ཡིན་ཏེ། སྐྱེ་རྒྱུད་གཅིག་གི་དུར་ས་བཟུང་བའི་མཐུ་ལྡན་གྱི་དགྲ་ལྷ་འཁོར་མང་ཞིག་ཡིན།

ཁྱེད་ནི་་་་་་་ལྷ་སྲིན་འཐབ་པའི་འདྲེས་མཚམས་ན་ལངས་པའི་དྲང་སྲོང་བླ་མའི་གདོང་རུས་སྐམ་པོ་ཞིག་མ་ཡིན་ཏེ། དུས་རབས་དུ་མའི་ཆགས་འཇིག་མཐོང་བའི་ལོ་རྒྱུས་ཀྱི གསང་ཉུལ་པ་ཞིག་ཡིན།

ཁྱེད་ནི་་་་་་་ཐམས་ཅད་ཀྱི་ཤུལ་ན་ལྷག་པའི་ནུས་མེད་ཀྱི་ཞ་བོ་ཀྱོག་ཀྱོག་ཅིག་མ་ཡིན་ཏེ། གཅོང་རོང་གི་ས་གཞི་བཏུལ་བའི་དམུ་རྒོད་ཁྱུ་གཅིག་གི་དཔལ་རྩལ་འགྲན་མེད་ཅིག་ཡིན།

ཁྱེད་ནི་་་་་་་ས་རྡོ་ལས་གྲུབ་པའི་གྱང་མཁར་རྙིང་བ་ཞིག་གི་བེམ་གཟུགས་མ་ཡིན་ཏེ། གཞི་རྩའི་བདེན་དཔང་སྲང་དུ་ཁུར་བའི་མི་རིགས་ཤིག་གི་ཁྲིམས་དཔོན་ཆེད་བསྐོས་ཤིག་ཡིན།

པིར་སྨྱུག་བུ་མོའི་བརྩེ་གླུ།

༡

ཤིང་ལྗོན་བཟང་ལོ་མའི་མཛེས་སྡུག་ལ་རོལ་བའི།།

བྱ་ཁུ་ལོའི་གསུང་གི་འགྱུར་ཁུག་ལ་དྲངས་ནས།།

ཤ་རུས་རྒྱུད་གཅིག་པའི་སྤུན་ཟླ་ཡི་ཚོགས་ལ།།

སེམས་གཏིང་ན་ལྕི་བའི་སྐད་ཆ་ཞིག་ངས་བཤད།།

ཕྱི་དགྲ་བོས་ལྕགས་ཀྱིས་རྐང་ལག་ཀུན་བཅིངས་ཡོད།།

ནང་ལུགས་སྲོལ་ངན་པས་སེམས་ཁམས་ཀྱང་བཟུང་འདུག།

དགྲ་ཕྱི་ནང་གཉིས་ཀྱི་བཙན་དབང་གི་བར་ནས།།

བློ་རིག་པའི་སྟོབས་ཀྱིས་བདེན་བ་ཞིགའཚོལ་དགོས།།

༢

སྤྲིན་དཀར་པོའི་སེམས་ཀྱི་འདབ་མ་ལ་རོལ་པའི།།

གསེར་འབྲུག་ཆུང་དགའ་བའི་མགྲིན་གླུ་ལ་དྲངས་ནས།།

སེམས་ཚོར་འགྱུ་འབྲི་བའི་སྙན་ངག་པའི་སྡེ་ལ།།

ཆར་བསིལ་མ་འབབ་འདྲའི་གསུང་གླེང་ཞིག་ངས་བཤད།།

སྔོན་བཙན་པོའི་ལོ་རྒྱུས་བར་སྣང་ནས་འཐོར་དུས།།

གངས་དཀར་པོའི་འཇིག་རྟེན་མི་ཁྲག་གིས་བསྣུབས་སོང༌།།

བློ་རིག་པའི་རལ་གྲི་རྣོ་བོ་རེ་ཡོད་ན།།

རང་མེས་པོའི་ཁྱིམ་གཞིས་དགྲ་དཔུང་ནས་ལེན་ཆོག།

༣

གངས་ལྷུན་པོའི་དཔལ་གྱི་མྱུ་གུ་ལ་རོལ་བའི།།

སེང་དཀར་མོའི་མགྲིན་པའི་ངར་གླུ་ལ་དྲངས་ཏེ།།

དེང་གཞོན་ནུའི་སེམས་ཀྱི་ལྷ་མོ་ཡི་མདུན་ན།།

གཏམ་མེ་ཏོག་འཛུམ་པའི་ཆུན་པོ་ཞིག་ངས་འབུལ།།

ལམ་ལུགས་སྲོལ་ནག་པོའི་ར་བ་ན་རྩེན་པའི།།

བློ་ཤེས་རྫུན་སྨྲ་བའི་ཀླད་ལྗང་གི་སྡེ་ལ།།

ལག་སྨྱུ་གུ་བཟུང་ནས་གཡུལ་ངོ་ལ་ཞུགས་དང༌།།

བློ་རིག་པའི་སྒོ་མོ་གནམ་ས་ལྟར་ཕྱེ་ཡོང༌།།

༣

དུས་དབྱར་ཟླ་དང་པོའི་མཛེས་སྡུག་ལ་རོལ་བའི།།

བྱ་འཇོལ་མོའི་སྙིང་གི་གསང་གླུ་ལ་དྲངས་ཏེ།།

ལོ་ན་ཚོད་སྨིན་པའི་བྱིས་པ་ཡི་ཚོགས་སུ།།

ཟས་འོ་ཆུ་ལྟ་བུའི་སྐད་ཆ་ཞིག་ངས་བཤད།།

རྟ་ནོར་ལུག་འཚོ་བའི་སྤང་ལྗོངས་དེ་བཞགས་ནས།།

མཁར་གྲུ་བཞི་བརྩིགས་པའི་སློབ་གྲྭ་རུ་ཆས་ཏེ།།

སྐད་ཡི་གེ་འབྲི་སའི་ཤོག་སྨྱུག་རེ་བཟུང་ན།།

རང་མེས་པོའི་རྒྱལ་ཁབ་རིག་པ་ཡིས་བསྐྲུན་ཡོང༌།།

༤

དགུང་ནམ་མཁའི་འཕུར་ལམ་རིང་མོ་དེ་འཛིན་པའི།།

བྱ་ཁྲུང་ཁྲུང་དཀར་མོའི་སྐྱོ་གླུ་ལ་དྲངས་ནས།།

བོད་གཞིས་བྱེས་གཉིས་ཀྱི་བདེ་སྡུག་གི་འཕྲིན་བ།།

ས་མི་མཇེད་ཞིང་གི་ཁྱོན་ཡངས་ན་ངས་འབྲི།།

ཨ་ཡིག་དཀར་པོའི་སྐྱེ་མཆེད།

                

བྱིས་དུས།

དྭངས་གཙང་གི་སེམས་པ།

ལོ་ཟླའི་བཞུར་རྒྱུན་དང་འདྲེས་ཏེ།

ནོར་ནག་གི་ལྷས་བར་ནས་གསལ་གསལ་དུ་བཞད།

གསལ་གསལ་དུ་འཚེར་བའི་བློ་རིག

ཉི་གཞོན་ཀྱི་འོད་འཛུམ་གྱིས་བསྐྱེད་དེ།

བདེ་སྣང་གི་ཀློང་ན་མུམ་བའི་རྣམ་ཤེས།

ཁ་བའི་མེ་ཏོག་དཀར་པོས་མདུན་བསུ་བྱས།

གཞོན་དུས།

དབྱར་འགོ་མའི་ཁུ་བྱུག

རི་ལུང་གི་བུ་མོ་དང་འགྲོགས་ཏེ།

ཞོགས་ཉི་དམར་པོའི་དབྱངས་རྟ་ལྷང་ལྷང་དུ་གྱེར།

ལྷང་ལྷང་དུ་གྱེར་བའི་མགྲིན་པ།

དབྱངས་གསལ་སོ་བཞིའི་རྩེ་འཇོ་ལ་དུང་ཞིང༌།

རིག་རྩལ་གྱི་ཀློང་ནས་དར་བའི་རྣམ་ཤེས།

མེས་པོའི་བསམ་གཞིགས་དཀར་པོས་མདུན་བསུ་བྱས།

དར་མ།

མཁའ་ལམ་དུ་བསྐྱོད་པའི་ཁྲུང་ཁྲུང་ཁྱུ་གཅིག

ནམ་ཟླའི་དྲོ་གྲང་དང་བསྟུན་ནས།

གཤོག་འགྱུར་གྱི་ཟློས་གར་ལྷབ་ལྷུབ་ཏུ་བསྒྱུར།

ལྷབ་ལྷུབ་ཏུ་བསྒྱུར་བའི་གཤོག་རྩལ།

ཡངས་པའི་ནམ་མཁའ་ནས་རྩེ་འགྲན་ལ་ཆས་ཤིང༌།

ཆགས་སྡང་གི་ཀློང་ནས་སྐྱེས་པའི་རྣམ་ཤེས།

བཙན་པོའི་དཔའ་སྐད་སྟོང་གིས་སྐྱེལ་འདྲེན་བྱས།

རྒན་པོ།

 ལྗང་མདོགས་ཀྱི་གསོན་ཉམས་ཟད་བའི་སྟོན་དུས།

གྲང་རླུང་གི་གཡོ་འགུལ་དང་བསྟུན་ཏེ།

མཐོ་སྒང་གི་གངས་ཆབ་ལྷུང་ལྷུང་དུ་འབབ།

ལྷུང་ལྷུང་དུ་འབབ་པའི་སེམས་གཞས།

ཕ་གཞིས་གཙང་མའི་ལོ་རྒྱུས་ལས་མཆོང་སྟེ།

བདེ་རྫུན་གྱི་ཀློང་ན་རྒྱས་པའི་རྣམ་ཤེས།

བཙན་པོའི་གཞུང་ལུགས་འབུམ་གྱིས་སྐྱེལ་མ་མཛད།

འཆི་བ།

རབ་རིབ་གྱི་དབྱིངས་སུ་བཞུགས་པའི་གངས་རི།

གོ་ལའི་འཁོར་བསྐྱོད་དང་བསྟུན་ཏེ།

དྲང་བདེན་གྱིས་བསྐྲུན་པའི་རྡོ་རིང༌།

སེང་འབྲུག་གི་དབྱེ་མཚམས་ན་བརྗིད་བརྗིད་དུ་བཞེངས།

བརྗིད་བརྗིད་དུ་འགྱིང་བའི་བློ་སྟོབས་ཀྱི་ལྷུན་པོ།

འཇིགས་སྐྲག་གི་ཀློང་ནས་རྒྱལ་སྟེ།

རེ་བ་ཁྲི་ཕྲག་ཁུར་བའི་རྣམ་ཤེས།

གངས་རིའི་དར་ཆ་བསྐྱོད་པའི་བར་སྣང་ནས་ཆས་འགྲོ།

༢༠༠༥།་༥།༧བལ་ཡུལ་ནས།

དྲན་འཆར་གསོན་པོ།

བསྟན་འཛིན་དཔལ་འཛོམས་དང་ཁ་གྱེས་རྗེས།

རྒྱ་ལྕང་ལོ་མའི་ནགས་མ་མཛེས་པར་འཁྲིགས།།

ཁུ་བྱུག་སྔོན་མོས་གྲེ་འགྱུར་ལྷོད་ཀྱིས་འཐེན།།

བསིལ་འཇམ་རླུང་བུའི་རེག་བྱ་མྱོང་བའི་དུས།།

སེམས་ཀྱི་གཏིང་ནས་ཁྱོད་ཀྱི་ཞལ་རས་འཛུམ།།

དཀར་གསལ་ཟླ་བ་ཤར་རིའི་རྩེ་ནས་བྱོན།།

ཁྱོད་ཀྱི་བཞིན་རས་སེམས་ཀྱི་ངོགས་ན་ཤར།།

ཟུངས་ཁྲག་དྲོན་མོ་སྨྱུ་གུའི་ཁ་ནས་བབས།།

སེམས་ཀྱི་མེ་ཏོག་གོས་ཆེན་ཁུག་ན་བཞད།།

    

ཁྱོད་སེམས་གཙང་མ་འཇམ་པོའི་ངག་ལས་བསྟན།།

གླན་པ་ཁོ་བོའི་ཚིག་ངན་མཚོན་ཆས་བསད།།

གཏན་དུ་གྱེས་པའི་ལམ་བུ་འདི་ལྟར་འཐེན།།

སྐྱིད་སྣང་དཀར་པོའི་ཉི་ཟེར་འདི་ལྟར་ཡལ།།

ཟླ་འོད་འོག་ནས་ཁྱོད་ཉིད་ནམ་ཡང་དྲན།།

མེ་ཏོག་ཐང་ནས་ཁྱོད་ཉིད་ལྷག་པར་དྲན།།

བལ་བོའི་ལྗོངས་ཀྱི་མཛའ་འདྲིས་གསུང་གླེང་དག།

ངྷ་སའི་བྲག་སྐྱ་ཇི་བཞིན་དུ་སེམས་ན་ལྕི།།

དྲན་གདུང་ལྕི་མོས་ཉིན་མཚན་ཡུག་གཅིག་བཟུང༌།།

བཟི་ཆང་བཙན་པོས་སེམས་ཀྱི་དཀྱིལ་འཁོར་བསྒྱུར།།

རེ་སྒུག་ལོ་ཟླ་བཞུད་པའི་མི་ཚེ་འདི།།

མྱུར་དུ་རྫོགས་པར་དཀའ་བའི་སུན་སྣང་སྐྱེས།།

ལག་འཛིན་གློག་ཀླད་རིགས་ལམ་སྟོང་གིས་གྲུབ།།

མྱུར་འཕྲིན་ཡི་གེ་སྐད་ཅིག་ཉིད་དུ་བསླེབས།།

དགའ་སྣང་འོད་ཀྱིས་སེམས་ཀྱི་མུན་པ་སངས།།

གློག་འཕྲུལ་སྙིང་པོར་འོ་ཞིག་བྱ་ན་འདོད།།

གཡུ་འབྲུག་སྔོན་མོ་སླར་ཡང་མཚོ་ནས་བཞེངས།།

སེམས་ཀྱི་ལྗོངས་ན་བདུད་རྩིའི་སྦྲང་ཆར་བབས།།

མི་ཡུལ་ཁམས་འདི་ལྷ་ཡི་ཞིང་ལ་འཁྲུལ།།

ཤོག་དཀར་ཐང་གི་མཛེས་མ་ཆགས་པས་མྱོས།།

              ༢༠༠༧།༧།༡༧ཉིན་རྡ་ས་ནས།