- ཀྭ་ཡེ་ཀློག་པ་པོ་ལགས། གཅིག་བྱས་ན། འདི་ནི་བདག་གི་ཆེས་མཐའ་མའི་སྙན་ངག་ཞིག་ཏེ། མི་ཚེའི་མྱངས་ཚད་འདུས་པའི་ཚེ་སྲོག་གི་ཆོད་སེམས་ཤིག་ཀྱང་ཡིན་སྲིད།
- བདག་ནི་ཤ་ཁྲག་རུས་རྐང་གི་འཇིག་རྟེན་གྱི་ཁྱོན་ནས། སེམས་ཉིད་རྣམ་ཤེས་ཀྱི་ངོ་བོ་འོད་སྣང་ལྟར་འཕུར་འགྲོ། འགྲོ་ཁ། བདག་འདྲེ་སྲིན་དུ་སྐྱེས་པའི་ལོག་སྨོན་འདེབ། འདི་ནི་བཙན་དྲག་ལ་ངོ་སོ་བསྟོད་ཅིང༌། གཉོམ་ཆུང་གི་ཚེ་སྲོག་འཇོམས་པའི་གཏེ་དཔོན་ལ་བཏབ་པ་ལས། མཛེས་སྣང་གིས་གྲུབ་པའི་མི་སྡེའི་འཇིག་རྟེན་ནི་བདག་གི་ཁྱིམ་གཞིས་ཡིན།
- ཁ་བ་ལྷབ་ལྷུབ་འབབ། རླུང་ནག་འཚུབ་འཁོར་རྒྱག དར་ལྕོག་དང་ལྡ་རྡི་འཐེན་པའི་བྲག་ཟོམ་ཞིག་ན། བདག་གིས་མི་ཤ་དང་མི་ཁྲག་གི་གསོལ་སྟོན་བཤམས་ཡོད། གལ་སྲིད་ཁྱེད་ཕེབས་འདོད་ན། སྨུག་སྤྲིན་གྱི་ཡོལ་ནག་གི་ཀློང་ནས་བདག་གིས་བསུ་བ་བྱ། གལ་སྲིད་ཁྱེད་ཀྱིས་ཟ་འདོད་ན་གློ་རྒྱུ་དང་ཀླད་ཞོ། རུས་རྐང་དང་ཚིལ་ཞགས་ཐོད་ཕོར་སྟོང་གི་ནང་དུ་བཤམས་ཡོད། འདི་ནི་ཁྱེད་ཀྱིས་གནམ་འོག་གི་ཟས་མཆོག་ཅིག་ཏུ་སྣང་བར་ཤོག
- བདག་གིས་མི་སེམས་ཀྱི་འོད་སྣང་གསོད་བཞིན། རྣམ་ཤེས་ཀྱི་སྐྱེ་རྒྱུད་འཕོ། ད་དུང་མི་ཁྲག་དམར་འཛར་འཛར་གྱི་ཚེ་སྲོག་མིད་ཀྱིན། མུན་ནག་གི་ཀློང་ནས་དགའ་བདེའི་དགོད་སྒྲ་བསྒྲོག རྐང་གླིང་གི་འགྱུར་ཁུགས་ཁྲོད་ནས། གནམ་སའི་དཀྱིལ་འཁོར་བཀུག་ཕྱིར། གསོན་འདྲེ་ཁྲི་མ་འབུམ་ལ་འབོད་བརྡ་གཏོང་ཞིང་ཤི་འདྲེ་སྲིན་པོའི་དཔུང་ཚོགས་བསུ་མ་བྱ། འདི་ནི་སྲིད་པའི་ལྗོངས་ཀྱི་སྐོང་ཚོགས་ཨང་དང་པོ་སྟེ། བདག་གིས་སྙན་ངག་གི་ཉམས་སྣང་སྒྲོགས་སྦྱང་བྱ་སའི་ཤེས་རབ་ཀྱི་གླིང་ཕྲན་ངོ་མ་ཡིན།
- བདག་འདྲེ་སྲིན་ཡིན། བདག་ནམ་ཡང་འདྲེ་སྲིན་ཡིན། མི་བོ་ལྷ་མིང་ཅན་གྱི་ཚེ་སྲོག་འཇོམས་བཞིན། མི་སྡུག་པའི་ཁོར་ཡུག་ཅིག་ནས་ཁྱོད་ལ་ཀྭི་འབོད་བྱེད། གངས་གླིང་གི་རྣམ་ཤེས་འཆི་སའི་དུ་ཁྲོད་ནས་ཁྱོད་ཉིད་དགའ་བའི་ཁྲག་མཆོད་དངེ༌། ཁྱོད་ཉིད་སྤྲོ་བའི་རུས་རྐང་སྤུངས། འདི་ནི་ཤི་གསོན་མ་ངེས་པའི་སྤྱི་ཚོགས་ཤིག་གི་གཤན་མ་དང༌། གདོན་འདྲེ་ཡི་རྒྱལ་ཁམས་སྐྱོང་བའི་རྣམ་ཤེས་ཤིག་གླུ་མཆོད་ཡིན། གནས་ལུགས་མེད་པའི་གནམ་འོག་དང༌། ཁྲིམས་ལུགས་མེད་པའི་སྤྱི་ཚོགས་ནི་བདག་གི་རྒྱལ་ཁམས་ཡིན། འདྲེ་སྲིན་གྱིས་སྐོར་བྲོ་འཁྲབ་སའི་དུ་ཁྲོད་དེ་བདག་གི་ཁང་ཁྱིམ་ལགས།
- ཁྱོད་ལ་ཐན་སྐད་སྒྲོག་མཁན་ནི་གནམ་རིམ་པ་དགུའི་སྟེང་ན་ཡོད། དེ་ནི་བྱ་ནག་འུག་པའི་འཁོར་ཚོགས་ཡིན་ཞིང་བདག་གི་ཕོ་ཉ་ཡིན། ཁྱོད་ལ་དམོད་བསྔགས་འདོན་མཁན་ནི་ས་ནག་རིམ་པ་དགུའི་འོག་ན་ཡོད། དེ་ནི་བྱི་བ་ནག་པོའི་འཁོར་ཚོགས་ཡིན་ཞིང་བདག་གི་བློན་ཚོགས་ཡིན། བྱ་ནག་འུག་པའི་ཐད་སྐད་དང་བྱི་པ་ནག་པོའི་ཁུན་སྒྲའི་བར་གསེང་ནས་ཁྱོད་ཀྱི་ཚེ་སྲོག་དྲངས་ཤིང་ཤིང༌། ཁྱོད་ཀྱི་བླ་ཟུངས་འཐེན་གྱིན། བདག་གིས་ཁྱོད་ཀྱི་རྣམ་ཤེས་གདོན་འདྲེན་འཇིག་རྟེན་ན་བསུ་བ་བྱ་ཆོག
- བདག་གིས་མུན་ནག་དང་རྨི་ལམ་འཐབ་པའི་བར་གསེང་ནས། འདས་ཟིན་པའི་ཁྱོད་ཀྱི་ཨ་མའི་ངོ་གདོང་གཡར་ནས། འཆི་གཤེད་སྲིན་མོའི་ལག་པ་གཡུག་བཞིན། གཤེན་རྗེའི་ཧོམ་ཁུང་མེ་འབར་གྱི་ནང་དུ་ཁྱོད་ལ་ཉལ་ཆས་བཏང་ཡོད། འདི་ནི་བྱང་སེམས་མེད་པའི་བླ་མ་དང༌། མགོ་བོ་མེད་པའི་སློབ་མའི་དཔུང་ཚོགས་ཀྱིས་ཁྱོད་ལ་དགའ་སྟོན་བཤམས་པ་ལགས།
- བདག་འདྲེ་སྲིན་དུ་གྱུར་ཡོད། བདག་ལ་ཚེ་སྲོག་གི་སྙིང་སྟོབས་ཡོད་པས། བདག་འདྲེ་སྲིན་གྱི་རྒྱལ་པོ་ཡིན། བདག་གིས་གདོན་འདྲེའི་རུ་དཔུང་བཤམས་ནས། གནོད་སྦྱིན་ལ་གནོད་ལན་དང༌། འདྲེ་སྲིན་ལ་འདྲེ་འཛིང་བྱ་ཆེད། བཙན་མ་མོ་དགུ་ཡི་གཤར་ལམ་གྱི་མདོ་དང༌། བདུད་འཇིགས་ཆེན་བརྒྱད་ཀྱི་གྲོས་ར་ཡི་ནང་ན་དཔའ་རྩལ་འགྲན་བསྡུར་གྱི་ཚོགས་ཆེན་ཞིག་བསྡུས་ཡོད། ཚེས་སྲོག་གི་དམར་འཛིང་བཤམས་པའི་གསོལ་སྟོན་འདི། མདའ་མཚོན་གྱི་ཆར་རླུང་འཚུབ་པའི་གླིང་ཕྲན་འདི། མི་ཁྲག་དང་འདྲེ་ཁྲག་འདྲིས་པའི་མཚོ་ངོགས་འདི་ན། འདྲེ་སྲིན་ཁྲི་མ་འབུམ་གྱིས་ཧབ་སྒྲ་སྒྲོག་བཞིན། མི་སེམས་བྱེ་བ་འབུམ་གྱི་སྣང་བརྙན་འཚེར་བཞིན། བདག་གིས་གདོན་འདྲེའི་རྒྱལ་ཁམས་ཀྱི་སྙན་ངག་སྒྲོགས་སྦྱང་བྱ།
- ཀྭ་ཡེ་ཀློག་པ་པོ་ལགས། ཁྱེད་ཀྱིས་གདོན་འདྲེའི་རྒྱལ་ཁམས་ཀྱི་སྙན་ངག་ལ་ཉན་འདོད་ན། ཁྱོད་ལ་ཚེ་སྲོག་གི་སྟོབས་ཤུགས་དགོས། ཁྱོད་ལ་རྣམ་ཤེས་ཀྱི་འོད་སྣང་དགོས། ཁྱོད་ལ་ཞེ་སྡང་གི་གསོན་ཤུགས་དགོས། ཁྱོད་ལ་ང་རྒྱལ་གྱི་སྙིང་སྟོབས་དགོས། ལོག་ལྟ་ཡི་འདུ་ཤེས་དགོས། ཁྱོད་ལ་མུན་ནག་གི་རྐང་ལམ་དགོས། ཆ་རྐྱེན་འདི་དག་ཁྱོད་ལ་མངའ་ན་འཇིགས་རུང་གི་དུ་ཁྲོད་ན་ཕེབས་དང༌། བདག་གིས་ཁྱོད་ཉིད་སྒུག་ནས་ཡོད།
- ༢༠༡༠།༡༠།༥ ཉིན་ངྷ་ས་ནོར་གླིང་ནས།
