ཀྱཻ་༸གོང་ས་མཆོག

ཀྱཻ་༸གོང་ས་མཆོག

་་་་་་་་་་སྙན་ངག་གི་མཆོད་བརྗོད།་་་་་་་་་

ཀྱེ་ྋགོང་ས་མཆོག  སྙན་ངག་ནི་མི་སེམས་རློན་པའི་ལེགས་སྐྱེས་ངོ་མ་ཞིག་སྟེ། དེ་ནི་མི་ཚེའི་ལོ་རྒྱུས་དང་འདྲེས་པའི་ཚེ་སྲོག་གི་བཞུར་རྒྱུན་ཞིག་དང༌། རྣམ་ཤེས་ཀྱི་འདབ་མ་འབུམ་ཕྲག་རྒྱས་པའི་མཆོད་སྤྲིན་དྭངས་མ་ཞིག་་་་་་་་ཁྱེད་ལ་ཕུལ་བ་ལགས།

ཀྱེ་ྋགོང་ས་མཆོག ལས་རླུང་གིས་ཁུར་ཡོང་བའི་བདག་གི་མི་ཚེ་འདི་ཁྱེད་ཀྱི་ཞིང་ས་རུ་བསླེབས། དུས་དེ་ནས། བདག་གི་སེམས་རྒྱུད་ན་ལང་ཚོའི་གོང་བུ་ཞིག་འཚེར་བ་སྟེ། ཁྱེད་སྐུའི་འོད་མདངས་ལགས།  འོན་ཀྱང་ཕྱོགས་རླུང་ཇི་ལྟར་ལྡང་བ་བཞིན། བདག་གི་འདུ་ཤེས་ཀྱི་སྙེ་མ་གཡོ་གར་འཕྱོ་བཞིན་བྱིས་དུས་ཀྱི་སྐྱེས་འཚར་འདི་ལྟར་བྱུང༌། 

ཀྱེ་ྋགོང་ས་མཆོག བག་མེད་ཀྱི་འཚོ་སྟངས་ལ་སྐྱུག་མེར་ལོག་པ་ནས།  བདག་གི་ལྷན་སྐྱེས་ཀྱི་སེམས་གཤིས་སུ་ཤེས་རབ་ཀྱིས་དབྱེ་ཞིབ་ཐུབ་བྱུང༌། མི་ཚེའི་ཁུག་སྣེ་འདི་ནས་བདག་ལ་མཁོ་བ་ནི་ལམ་ཁ་དང༌། བདག་ལ་མཁོ་བ་ནི་རིག་པ། བདག་ལ་མཁོ་བ་ནི་ཤེས་རབ་ཀྱི་སྙིང་ཁམས་ཡིན་པར་ཤེས། འདི་ནི་གཞོན་ནུའི་ལང་ཚོ་དང་འགྲོགས་པའི་འཇིག་རྟེན་རབ་རིབ་ཅིག་སྟེ། ཉི་མའི་འཛུམ་མདངས་ལ་ཕྱོགས་པའི་རྣམ་ཤེས་ཤིག་གི་རེ་སྨོན་ལགས།  

ཀྱེ་ྋགོང་ས་མཆོག  མཛེས་སྡུག་གི་ཕ་ས་མིག་འོད་ནས་ཤོར་བཞིན། བརྩེ་འདང་གྱི་སེམས་པ་བཞུད་ལམ་ནས་བཞུད་ལམ་དུ་འཐེན་བཞིན། རི་བོ་ཧི་མ་ལ་ཡའི་ཕར་ངོགས་ན་བདག་འདི་ལྟར་ཆས།  དཀར་གསལ་ཟླ་བའི་འཛུམ་ངོགས་ནས་ཁྱེད་ཀྱིས་བདག་ལ་མགོན་སྐྱབས་མཛད་ཕྱིར། བདག་གིས་ལམ་སྣེ་རྡོག་པས་འབོར་མ་མྱོང༌།

ཀྱཻ་ྋགོང་ས་མཆོག ཁྱེད་ཀྱི་འཛུམ་ཞལ་ལ་མཇལ་བའི་ཐོག་མ་དེར། བདག་གི་ཤེས་རབ་ཀྱི་གོམ་བགྲོད་ལ་བགེགས་མེད་དང༌། བདག་གི་རེ་འདུན་གྱི་མེ་ཏོག་སྔར་ལས་མཛེས་པར་ཤོག  འདི་ནི་བདག་གི་སེམས་གཏིང་ནས་བཞད་པའི་གསོལ་འདེབས་ཀྱི་མེ་ཏོག་རྐང་གཅིག་ཡིན། 

ཀྱཻ་ྋགོང་ས་མཆོག མི་སེམས་ཀྱི་འདུན་པ་གཅོད་པའི་གནོད་སྦྱིན་དང༌། རྣམ་ཤེས་སྐྱེས་བརྒྱུན་ཟ་བའི་སྲིན་པོ་ལ་མཐུ་རྩལ་རྒོད་ཕྱིར།  བདག་གིས་ཤེས་རབ་ཀྱི་སྒོ་མོ་ཧུར་བརྩོན་གྱིས་ཕྱེ་ག་ལ་ཐུབ། ཕ་མའི་ཁྱིམ་གཞིས་སྣུམ་པོ། མི་ཡུལ་གྱི་བྲག་སྐྱ་ལ་བརྗེས་པ་ནས་བཟུང༌། བདག་ལ་མུ་གེའི་རྐང་ལམ་འཐེན་པའི་ལོ་རྒྱུས་ལས་ཤེས་རབ་ཀྱི་སྣང་བ་ཐོབ་པའི་ཉི་མ་ཞིག་ཤར་མ་མྱོང༌། བདག་གི་སྙིང་ཁོངས་ན་སུབ་ཏུ་མེད་པའི་ན་ཟུག་གི་རྨ་ཁ་དེ་ལྟར་བཞགས།

ཀྱཻ་ྋགོང་ས་མཆོག དྲང་བདེན་གྱི་སེམས་པ། སྒྱུ་མའི་མནར་གཅོད་རྫོགས་མེད་ཀྱིས་གསོད་དུས། བདག་གིས་བདེན་རྫུན་དབྱེ་ཞིབ་མཐོང་བའི་ལྷ་སྲུང་དང༌། ཆོས་ཉིད་གསལ་དུ་རྟོགས་པའི་བླ་མ་ཞིག་མེད་པར་སྙམ། འོན་ཀྱང༌། ཁྱེད་ཀྱིས་བདེན་དོན་ལ་གསལ་འགྲེལ་བྱེད་ཐེངས་རེ་རེར།  གཡང་གཟར་དུ་ཕྱོགས་པའི་བདག་གི་སེམས་འགྱུ་ཕྱི་རུ་འཁོར་ཏེ། རང་ཉིད་ཀྱི་འདུ་ཤེས་ལ་དྲང་ལྡོག་གི་དབྱེ་ཞིབ་ལན་མང་བྱས་མྱོང་ཡོད། 

ཀྱཻ་ྋགོང་ས་མཆོག བདག་གི་རྣམ་ཤེས་བསླུ་མེད་ཀྱི་ཡུལ་དུ་གནས་པ། ཁྱེད་ཁོ་ནའི་བྱིན་རླབས་ལགས། འོན་ཀྱང་གནོད་སྦྱིན་ནག་པོའི་ཟིལ་ཤུགས་ནི་ཕྱོགས་མཐའི་རླུང་བུ་ཇི་བཞིན། བདག་གི་ཚེ་སྲོག་གཡུལ་ས་རུ་འཁུར། ཤེས་རབ་ཀྱི་ལམ་བུ་རྐང་འོག་ནས་འཕྲོག་ཅིང༌། ལྷིང་འཇགས་ཀྱི་ཁོར་ཡུག་ལ་གཡོ་འཁྱོམ་བརྒྱབ། འདི་ནི་ངའི་འཇིག་རྟེན་ང་ལ་མི་དབང་བའི་དུས་ཚོད་ཉེན་འཕྲང་ཅན་ཞིག་སྟེ། དེ་ནི་སྡེ་བརྒྱད་འཁྲུགས་པའི་ཟློས་གར་གྱིས་གཟིལ་བའི་རྣམ་ཤེས་ཤིག་གི་སྡུག་བསྔལ་མྱོང་སྟངས་ཤིག་ལགས།

ཀྱཻ་ྋགོང་ས་མཆོག མཚམས་འདི་ནས་བདག་གིས་སྐད་ཆ་གཞན་དུ་བསྒྱུར་ནས་བཤད། གནམ་སྔོན་པོས་བདག་ལ་གདམ་ག་ཞིག་བསྩལ་བྱུང༌། འཆི་བ་ལས། ངུར་སྨྲིག་གི་འཇིག་རྟེན་ནས་བུད་དེ། མི་ནག་གི་སྒོ་ཁྱིམ་བརྒྱུད། བཤད་ཡམས་ཆེ་བའི་སྤྱི་ཚོགས་ཀྱི་ཁྲིམས་ཁང་ནང་བཙོན་འཇུག་བྱ་རྒྱུ་དེ་རེད། བདག་ལ་སྒུལ་ཤུགས་མེད། བདག་ལ་གསོན་སྟོབས་མེད། བདག་ལ་ཅི་ཡང་མེད། འདི་ལྟར་བདག་བཙོན་ཁང་དུ་ལྷུང༌།

ཀྱཻ་ྋགོང་ས་མཆོག རྐང་ལག་རྒྱངས་ཤིང་དུ་བསྡམས་པའི་ཉེས་མེད་བཙོན་པ་ཞིག་གིས། ཁྱེད་ལ་གསོལ་བ་འདེབས། ཁྱེད་ཀྱི་གསེར་ཞལ་མིག་ལམ་དུ་སྒོམ་བཞིན། བདག་གིས་སྐྱེ་བ་ནས་སྐྱེ་བའི་བར་དུ་དགྲ་ལ་མགོ་བོ་མི་སྒུར་ཞིང༌། འདྲེ་སྲིན་གྲོགས་སུ་མི་འཛིན་ཟེར། འདི་ནི་ཚེ་སྲོག་དགྲ་ལག་ལ་ཤོར་བའྀ་སྐྱེས་བུ་ཞིག་གི་ཆོད་སེམས་ཉག་གཅིག་ལགས།  

ཀྱཻ་ྋགོང་ས་མཆོག ནམ་མཁའ་སྔོ་ཞིང་དྭངས། ཉི་མའི་འཛུམ་མདངས་ལེགས། བསིལ་རླུང་དལ་བུར་ལྡང༌། དཀར་ངོགས་ཀྱི་འཇིག་རྟེན་འདི་ནས་བདག་གི་མི་ཚེ་འདི་ལྟར་བཞུད་སོང༌།  བདག་གིས་མི་ཚེའི་མྱོང་རྟོགས་ཀྱི་སེམས་པ་ཞིག་ཡིག་ངོགས་ཀྱི་འཇིག་རྟེན་ན་སྐྱོམ་བཞིན་ཁྱེད་ཀྱི་མཁྱེན་བརྩེའི་འོད་སྟོང་ལ་སྒུག་ནས་ལགས།  

ཀྱཻ་ྋགོང་ས་མཆོག སྙན་ངག་གི་མཆོད་པ་འདི་ནི། སྲིན་པོ་ངོ་དམར་ཞིག་གི་གཟིར་ཤུགས་འོག སྐབས་རེར་འཆི་ཞིང༌། སྐབས་རེར་གསོན། ཡང་ཤི་ཡང་གསོན་དགུ་རུ་མྱོང་བའི་ཟིན་ཐོ་ཞིག་ཡིན། འདི་ནི་རང་ཉིད་ཤི་གསོན་རེས་མོས་ཀྱི་བར་གསེང་རེ་རེར།  སེམས་སྤོབ་དབུ་ཆང་གིས་བསྐྱེད་ནས་བྲིས་པ་ལགས།  འདི་ན་བདག་གི་མེས་པོ་རྣམ་པའི་ཕྱི་རྗེས་ལ་བསྙེན་བཀུར་དང༌། ཤ་ཁྲག་རུས་རྐང་གཅིག་པའི་བདག་གི་མི་རིགས་ཀྱི་ཞེན་ཆགས། བཙན་པོའི་རྒྱལ་ཁབ་རྗེས་སུ་དྲན་པའི་གདུང་དབྱངས་སུ་གླུ་སྐད་བསྲེས་ནས་སྙན་པར་བརྗོད་ཁུལ་བྱས་ཡོད། སྙན་ཚིག་གི་ས་བོན་འདི་དག་ཤོག་དཀར་ཐང་དུ་བཏབ་ན་འདོད་ནས་ལོ་མང་ཕྱིན་ཀྱང༌། སྐྱ་ཟད་ཆེ་བའི་བདག་གི་འཚོ་བའི་ཁྲོད་ནས་ཅི་ནས་ཀྱང་སྙན་དེབ་ཀྱི་ལྗང་ལོ་ཞིག་སྐྱེས་མ་ཐུབ་ལགས། འོན་ཀྱང་དེ་རིང་གཞོན་སྐྱེས་ཤིག་གི་རིག་སྟོབས་ལ་བརྟེན་ནས་དྲྭ་ངོགས་ཀྱི་འཇིག་རྟེན་འདིར་་གངས་ལྷ་མེ་ཏོག་གི་ཚུལ་དུ་བཞད་བསྐལ་ཐོབ་ཡོད་ན། ཁྱེད་ཀྱི་ཡེ་ཤེས་མཁྱེན་དཔྱོད་ཀྱི་དབྱངས་སུ་མཆོད་སྤྲིན་དུ་འགྱུར་བ་སྨོན། ཀྱཻ་ྋགོང་ས་མཆོག་་་་་་་་་་་་

ཕྱི་ལོ་༢༠༡༠།༩།ནས་ཕྱི་ལོ་༢༠༡༡ །༤། ༡༦ བར།  ལྡི་ལི་ནས།